Судебник 1550 г.

 

Лета 7000 пятдесят осмаго июня ... царь и великий князь Иван Васильевич  всеа Русии с своею братьею и з бояры сесь Судебник уложыл: как судити бояром, и околничим, и дворецким, и казначеем, и дьаком, и всяким приказным людем, и по городом наместником, и по волостем волостелем, и тиуном и всяким судьям

     1. Суд царя и великаго князя судити боаром, и околничим, и дворецким, и казначеем, и дьяком. А судом не дружыти и не мстити никому, и посулу в суде не имати; також и всякому судье посула в суде не имати.

     2. А которой боярин, или дворецкой, или казначей, или дьак просудится, а обвинит кого не по суду безхитростно, или список подпишет и правую грамоту даст, а обыщется то в правду, и боярину, и дворецкому, и околничему, и казначею, и диаку в том пени нет; а истцом суд з головы, а взятое отдати.

     3. А которой боярин, или дворецкой, или казначей, или дьяк в суде посул возмет и обвинит не по суду, а обыщется то в правду, и на том боярине, или на дворецком, или на казначеи, или на дьяке взяти исцов иск, а пошлины царя и великаго князя, и езд, и правда, и пересуд, и хоженое, и правой десяток, и пожелезное взяти втрое, а в пене что государь укажет.

     4. А которой дьак список нарядит или дело запишет не по суду, не так, как на суде было, без боярьского, или без дворецкого, или без казначеева ведома, а обыщется то в правду, что он от того посул взял, и на том дьаке взяти перед боярином вполы да кинути его в тюрму.

     5. Подьачей, которой запишет не по суду для посула без дьячего приказу, и того подьячего казнити торговою казнью, бити кнутьем.

     6. А кто виноватой солжет на боярина, или на околничего, или на дворецкого, или на казначеа, или на дьяка, или на подьячего, а обыщетца то в правду, что он солгал, и того жалобника, сверх его вины, казнити торговою казнью, бити кнутьем, да вкинути в тюрму.

     7. А кто х которому боярину, или к дворецкому, или к казначею, или к дьаку придет жалобник его приказу, и ему жалобников своего приказу от собя не отсылати, а давати ему жалобником своего приказу всем управа, которой будет жалобник бьет челом по делу; а которому будет жалобнику без государева ведома управы учинити не мочно, ино челомбитье его сказати царю государю. А которой боярин, или дворецкой, или казначей, или дьак жалобника своего приказу отошлет, а жалобницы у него не возьмет, и управы ему или указу не учинит, и царю государю челомбитьа его не скажет, и учнет тот желобник бити челом государю, что ему управы не учинили, и государь ту его жалобницу отошлет тому, чей суд, и велит ему управу учинити, и бояре ему, или дворецкой, или казначей управы не учинят же, и тем, которые управы не учинят, быти от государя в опале. А которой жалобник бьет челом не по делу и бояре ему откажут, и тот жалобник учнет бити челом, докучати государю, и того жалобника вкинути в тюрму.

     8. А имати боарину, и дворецкому, и казначею и дьяку в суде от рублевого дела на виноватом пошлин, кто будет виноват, ищеа или ответчик, и боярину, или дворецкому, или казначею на виноватом одиннатцать денег, а дьяку семь денег, а подьачему две денги; а будет дело выше рубля или ниже рубля, и им имати пошлины по росчету; а болши того им не имати; а от записки подьячему не имати ничего. А возмет боарин, или дворецкой, или казначей, или дьак, или подьячей, или неделщик на ком что лишек, и на том взяти втрое. А хто учнет бити челом на боярина, или на дьяка, или на подьячего, или на неделщика, что взяли на нем сверх пошлин лишек, и обышется то, что тот солгал, и того жалобника казнити торговою казнью да вкинути в тюрму.

     9. А досудятся до поля, да не став у поля, да помирятся, и боярину, и дворецкому, и казначею, и дьаку, и подьячему имати по тому ж указу, а околничему, и дьаку, и подьячему, и неделщику пошлин полевых не имати. А возмет боярин, или околничей, или дворецкой, или казначей, или дьяк, или неделщик, или подьячей лишок болши того, и обыщется то, и на том взяти втрое. А обыщется то, что жалобник солгал, и того жалобника казнити торговою казнью да вкинути в тюрму.

    10. А у поля став помирятся, и боярину, и дворецкому, и казначею, и дьаку имати пошлины по тому ж росчету; а околничему имати полевых пошлин четверть рубля, а дьяку четыре алтыны, а подьячему денга, а неделщику имати четверть рубля, да неделщику ж имати вящего два алтына; а болши им того не имати. А кто возмет лишек, и на том взяти втрое. А обыщется то, что жалобник солгал, и того жалобника казнити торговою казнию да вкинути в тюрму.

     11. А побьются на поле в заемном деле или в бою, и околничему полтина да за доспех убитого три рубля, а дьаку четверть рубля, да неделщику полтина, да неделщику ж вясчего четыре алтына без дву денег, а подьячему две денги. А не станет кто у поля или от поля збежыт, ино околничему и дьаку и неделщику имати на том, как и с мирового дела; а избные пошлины с рубля по гривне; а болше им того не имати. А возмет кто лишек, и на том взяти втрое. А обыщется то, што жалобник солгал, и того жалобника казнити торговою казнью да вкинути в тюрму.

     12. Побьются на поле в пожеге, или в душегубьстве, или в розбое или в тадбе, ино на убитом исцово доправити, да околничему на убитом полтина да за доспех убитого три рубля, а дьяку четверть рубля, а неделщику полтина, да неделщику ж вязчего четыре алтыны без двух денег, а подьячему две денги. А убитого дати на поруку: как его государь попытает, ино его поставити перед государем; а не будет по нем поруки, ино его вкинути в тюрму, доколе по нем порука будет.

     13. А к полю приедет околничей и дьак, и околничему и дьаку вспросити исцов, и ищей и ответчиков: кто за ним стряпчие и поручники; и кого за собою стряпчих и поручников скажут, и им тем велети у поля стоати; а доспеху и дубин и ослопов стряпчим и поручником у себя не дръжати. А бой полщиком давати околничим и дияком ровен. А которые будут у поля опричные люди, и околничему и дьяку от поля их отсылати; а которые прочь не пойдут, и им тех отсылати в тюрму.

     14. А битися на поле бойцу з бойцом или небойцу с небойцом, а бойцу с небойцом не битися; а похочет небоец з бойцом на поле битись, ино им на поле битись. Да и во всяких делех бойцу з бойцом, а небойцу с небойцом, или бойцу с небойцом по небойцове воле на поле битися по тому ж.

     15. А ищеа пошлется на послуси в заемном деле бес кабалы или в какове деле ни буди, и послуси став да меж собя порознятся: иные молвят в ысцевы речи, а иные в ысцевы речи не молвят; и которые молвят в ысцевы речи, а попросят с ними те послухи, которые не молвят в ысцевы речи, поля, ино им присужати поля; а убьют на поле послуси те, которые послушествовали в ысцевы речи, тех послухов, которые не послушествовали в ыстьцовы речи, ино исцово и пошлины имати по списку на ответчике и на тех послусех, которые не послушествовали в ысцовы речи; а которые послуси не послушествовали в ысцовы речи убьют будет на поле тех послухов, которые послушествовали в ысцовы речи, ино имати пошлины по списку на ищее и на тех послусех, которые послушествовали в ысцовы речи, а не попросят поля те послуси, котрые послушествовали в ысцовы речи, с теми послухи, которые не послушествовали в ысцовы речи, или послухи не договорят в ысцовы речи, ино тем ищеа виноват. А по кабале порознят послухи и дьяк, ино по тому же.

     16. А кого послух опослушествует в бою, или в грабежу, или в займех, ино суд на ответчикову волю: хочет, с послухом на поле лезет или, став у поля у креста, на целование ему или без целованиа даст; а вины в том ответчику и пошлин полевых убитых нет; а побьютца на поле, и пошлины судные и полевые взяти по указу на убитом.

     17. А против послуха ответчик будет стар, или мал, или чем увечен, или поп, или чернец, или черница, или жонка, и тому против послуха наймит, а послуху наймита нет; а которой послух чем будет увечен безхитростно, или будет в послусех поп, или чернец, или черница, или женка, тем наймита наняти волно ж. А что правому или его послуху учинится убытка, и те убытки имати на виноватом.

     18. А послух перед судью не придет, есть ли за ним речи, нет ли, ино на том послухе исцово и убытки и все пошлины взяти; а с неделщиком и с праведчиком о сроце тому послуху суд.

     19. А на ком взыщет женка, или детина, или стар, или немощен, или чем увечен, или поп, или чернец, или черница, ино им наймита наняти волно, а ответчику против наймита наймит же; а истцу и ответчику крест целовати, а наймитом битися. А похочет истец или ответчик сам битися с наймитом, и он бьется.

     20. А кто взыщет человекех на трех или на четырех по жалобнице, а напишет в жалобнице человек десять или пятнадцать, или болши или менши, и те два или три за собя и за иных товарыщев отвечают, а за иных не отвечают, и за которых по жалобници отвечают, ино тех судити в их жеребьех; а за которых людей не отвечают по жалобнице, ино в тех их жеребьех велети посылати пристава; а будет по тех людей ходила приставная, ино по той срочной в их жеребьех давати безсудные.

     21. А на которого из них ездок срочную накинет на одного, и тот срочные своей товарыщем своим, которые с ним в срочные писаны, не покажет, и на которых его товарыщев выляжет в их жеребьех безсудная грамота, ино тем людем с тем дати суд, хто им срочные не показал.

    22. А которые люди учнут искати на наместникех или на волостелех и на их людех по жалобницам, и оне не за всех учнут отвечати, а исцы учнут искати на наместникех или на волостелех и на их людех всего своего иску по жалобнице и без тех, за которых людей не отвечают, и по тем их жалобницам судити во всем иску по жалобнице без тех людей, за которых не отвечают.

    23. А которых людей исцы учнут примешивати к наместничим людем или к волостелиным людем городских людей или волостных, а наместничи или волостелины люди за тех городцких людей или за волостных отвечати не похотят, и наместничих и волостелиных людей судити в их вытях, а на тех городцкых или на волостных людей в их вытех давати пристава; а до наместничих и до волостелиных людей в тех вытех дела нет.

    24. А которые люди иногородцы учнут бити челом на наместников или на волостелей о обидных делех, как те наместники или волостели, едучи на жалованье, и на жалованье жывучи, или едучи з жалованья, кого чем изобидят, и тем людем иногородцом приставов на наместников и по волостелей и по их людей и до съезду з жалования давати, а велети тем наместником и волостелем присылати в свое место к ответу людей своих. А которые иногородцы не учнут о тех своих обидных делех бити челом на наместников или на волостелей и на их людей по году, и тем людем тогды приставов и суда на намесников и на волостелей и на их людей не давати.

    25. А который ищеа взыщет бою и грабежу, и ответчик скажет: бил, а не грабил, и ответчика в бою обвинити и бесчестие на нем взяти; а в пене, посмотря по человеку, что государь укажет; а в грабеже суд и правда, а во всем не обвинити; а скажет, что грабил, а не бил, и на том грабеж доправити, хто скажет грабил; а в пене, посмотря по человеку, что государь укажет; а в бою суд и правда. А в ыных делех судити по тому ж: кто в чем скажется виноват, то на нем и взяти; а в пене что государь укажет, посмотря по человеку; а в достали суд и правда, крестное целование.

    26. А бесчестие детем боярским, за которыми кормлениа, указати против доходу, что на том кормление по книгам доходу, а жене его безчестья вдвое против того доходу; которые дети боарьские емлют денежное жалование, сколко которой жалованьа имал, то ему и бесчестие, а жене его вдвое против его бесчестиа; а дьаком полатным и дворцовым безчестие что царь и великий князь укажет, а женам их вдвое против их бесчестиа; а торговым гостем болшим пятьдесят рублев, а женам их вдвое против их бесчестиа; а торговым людем и посадцким людем и всем середним бесчестиа пять рублев, а женам их вдвое бесчестиа против их бесчестиа; а боярскому человеку доброму бесчестиа пять рублев, опричь тиунов и довотчиков, а жене его вдвое; а тиуну боярскому или довотчику и праведчику бесчестиа против их доходу, а женам их вдвое; а крестианину пашенному и непашенному бесчестиа рубль, а жене его бесчестиа два рубля; а боярскому молотчему или черному городцкому челавеку молодчему рубль бесчестиа, а женам их бечестиа вдвое. А за увечие указывати крестианину, посмотря по увечию и по бесчестию; и всем указывати за увечие, посмотря по человеку и по увечью.

     27. А которой чюжеземец взыщет чего на чюжеземце же, ино того воля, на ком взыщет: хочет сам отцелуется, что в том не виноват, или у креста положит, чего на нем взыщет, и истец, поцеловов крест, да возмет. А которой человек здешнаго государьства взыщет на чюжеземце или чюжеземец на здешнем человеке, и в том им дати жеребей: чей ся жеребей вымет, тот, поцеловав, свое возмет или отцелуется.

     28. А которое будет дело судит царь и великий князь, или дети царя и великаго князя или бояре, и которой суд не кончается, оставят его в обговоре, и дьяку исцовы и отвечиковы речи велети записати перед собою; или о чем ся пошлют на послушество, и дьаку велети то записывати перед собою ж; да те ему дела держати у собя за своею печатью, доколе дело кончается. А которые дела дадут дьяки подьячим с черна начисто переписывати, и дьяком к тем жалобницам и к делом по сставом руки прикладывати. А как подьачей с черна начисто перепишет дело, и дьаку те все дела справити самому, да к тем делом дьаку руку свою приложить; а держать те дела дьаку у собя за своею печатью. А подьячему у собя дел никоторых не дръжати; а вымут у подьячего список или дело за дьячею печатью, а руки дьячей у того списка или у дела не будет или у жалобницы, и тот список и пошлины и езд взяти на дьяке, в подьячего бити кнутьем; а вымут у подьячего список или дело за городом или на подворие, и тот список взяти на дьяке, а подьячего казнити торговою казнью да выкинути ис подьячих, и ни у кого ему в подьячих не быти.

    29. А которые дела судят бояре, и тот суд велети записывати перед собою; а исцом у записки не стояти; а будет надобе на которое дело истца или отвещика вспросити, ино его к собе позвати да, вспросив его, от записки отослати. А как дело их дьяк запишет, и того дела перед истцы не чести, а прочести его бояром.

    30. А случится суд сместной, ищеа или ответчик судимы будут не одному судье, и кто по кого взведет пристава в какове деле ни буди, и тот ищеа возмет у своего судьи за собою сторожа да идет к тому судье просити пристава, у кого в присуде тот, на ком ему искати, да перед тем судьею ищет; а будет тот отвещик, не сходя с суда, против на нем взыщет, и ему перед тем судьею отвечяти. Да и во всяких делех судити сместной суд тому судье, у кого в присуде отвечик. А пошлины обеим судьям имати по указу, а делитись судьям пошлинами по половинам; а пошлины обеим судьям имати одне.

    31. А кто кого поимает приставом в бою, или в лае или в займе, а на суд итти не похотят, и оне доложат судьи да помирятся, а судье пошлин и продаж на них нет, опричь езду и хоженого. А которые жалобницы заданы судьям и оба истца до суда помирятся, и по тем жалобницам судьям пошлин не имати ж.

    32. А неделщику на суде на боар и на дворецкого, и на околничих, и на казначеев, и на дьяков посулов не просити, и самому неделщику посулов не имати. А которой неделщик возмет на суде на боярина, или на околничего, или на дворецкого, или на казначеа, или на дьяка посул, или собе посул возмет, и уличат его в том, и того неделщика казнити торговою казнью, а посул на нем доправити втрое да из недель выкинути.

    33. А пошлины имати от правые грамоты боярину от печати с рубля по девяти денег, а дьаку имати от подписи с рубля по алтыну, а подьячему, которой правую грамоту напишет, с рубля имати по три денги; а болши того не имати. А кто возмет болше того и уличат его в том, и на том взяти втрое. А обыщется, что жалобник солгал, и того жалобника казнити торговою казнью да вкинути в тюрьму.

    34. А докладной список боярину, или дворецкому, или казначею печатати, а дьяку подписывати; а имати от печати боярину, или дворецкому, или казначею с рубля по алтыну, а дьяку с рубля по четыре денги, а подьячему, которой на списке напишет, с рубля по две денги; а болши им того не имати. А кто возмет лишек и уличат его в том, и на том взяти втрое. А обыщется то, што жалобник солгал, и того жалобника казнити торговою казнью да кинути в тюрму.

    35. А с холопа и с робы от правые грамоты и от отпускные боарину, или дворецкому, или казначею имати от печати з головы по девяти денег, а дьяком имати от подписи з головы по алтыну, а подьячему, которой правую грамоту напишет или отпускную, з головы имати по три денги.

    36. А кто займет денги в рост в кабалу, и на те кабалы отписи без боярского докладу и без дьячей подписи не быти. А боярину от всякиа отписи, в колке отпись ни буди, имати от печати по три денги, а дьяку имати от подписи по две денги, а подьячему, которой отпись напишет, имати по денги.

    37. А с царева и великаго князя суда и детей царя и великаго князя суда пошлин на виноватом по тому ж, как и з боярьского суда, с рубля по одиннатцати денег, кому государь укажет, а дьяку семь денег, а подьячему две денги.

    38. А цареву и великаго князя печатнику и детей царя и великаго князя печатнику от печати имати от правые грамоты с рубля по девяти денег, а дьяку с рубля по алтыну, а подьячему, которой правую грамоту напишет, имати с рубля по три денги.

    39. А з докладного списка царя и великаго князя докладу и детей царя и великаго князя докладу имати цареву и великаго князя печатнику и детей царя и великого князя печатнику имати с рубля по девяти денег, а дьяку от подписи с рубля по алтыну, а подьячему, которой на списке напишет, имати с рубля по две денги.

    40. А с холопа и с робы от правые грамоты имати печатнику з головы по девяти денег, а дьяку от подписи имати по алтыну, а подьячему, которой правую грамоту напишет, имати з головы по три денги.

    41. А от срочных от подписей имати дьяку с срочные по две денги, а от отписных срочных дьяку имати от подписи с рубля по три денги, а подьячим от подписи имати с рубля по две денги. А похотят оба исца, ищея и отвечик, срок отписати, и оне оба платят от подписи, от писма и неделщику хоженое по половинам. А которой ищеа или ответчик к сроку не приедет, а пришлет срок отписывати, и тому все платити одному от обеих срочных и хоженое, опричь служилых людей; а будет оба истцы, ищеа или ответчик, служилые люди, а пошлют их на службу, а похотят перед тем сроком недели за две или за три до того сроку, на которой день велено им на службе быти, по срочным срок отписати, и тем служилым людем недели за две или за три отписывати беспошлинно для службы. А срочные дьаком дрьжати у собя за своею печатью. А как давати безсудные, и дьяком срочные снести в одно место самим да, розобрав срочные самим дьаком по сроком, да велети им подьячим безсудные давати и сроки отписывати. А у подьячих дьяком срочных не держати; а у которой дьяк срочные учнет держати у подьячих срочные не у собя, и у чьего подьячего ищеа или ответчик с приставом вымут срочную подписану до сроку, а не за дьячею печатью, и на том дьяке тот иск, что в срочной написано, доправити; а дьяк с своим подиячим сам ся ведает.

    42. А безсудные грамоты давати за сто връст семым днем, а дале того по тому ж росчету. А пошлины имати от правые и от безсудные царя и великаго князя печатнику от печати с рубля по алтыну, а дьяку от подписи с рубля по алтыну же, а подьачему с рубля по две денги; а болше им того не имати. А кто возмет болше того и уличат его в том, и на том взяти втрое. А кто солжет, того казнити торговою казнью да вкинути в тюрму.

    43. А велит государь кому какову дата грамоту лготную, или уставную, или полетнюю с красной печатью, и что возмет печатник от печати от которые грамоты, а дьяку от подписи взяти тоже. Торханных вперед не давати никому; а старые тарханные грамоты поимати у всех.

    44. А от приставных имати царя и великаго князя печатнику и дьяку у неделщиков по езду, с которые приставные рубль езду, и печатнику у неделщика имати от печати с рубля по алтыну, а дьяку от подписи с рубля алтын же; а будет езду до которого города рубля болши или менше, и печатнику и дьяку имати по тому ж росчету. А будет в приставной иск менши того езду, и дьяком тех приставных не подписывати, а того неделщика кинути в тюрму да сказати царю государю. А без неделщиков дьяком приставных не подписывати; а в приставной болши двадцати вытей не писати; а неделщику от приставной один езд; от которого города в которой город приставная написана. А подпишет которой дьяк приставную, а в приставной иску будет менши езду, или подпишет приставную без неделщика, и уличат его в том, и што в приставной иску, и тот иск взяти на дьяке, а в пене что государь укажет.

    45. А хоженое неделщику в городе десять денег, а на правду вдвое; а от поруки неделщиком поминков не имати; а езд неделщику имати вдвое до которого города по указу, а с правды им имати вдвое езду; а болши того им не имати.

    46. А езду от Москвы до Коломны полтина, до Коширы полтина, до Хотуни десять алтын, до Торусы дватцать алтын, до Алексина полтретьятцать алтын, до Колуги рубль, до Ярославца полтина, до Боровскаго полтина ж, до Вышегорода полтина, до Кременска дватцать алтын, до Можайска полтина, до Вязмы полтора рубля, до Воротынска сорок алтын, до Козелска рубль с четвертию, до Одуева сорок алтын, до Белева рубль с четвертью, до Мезецка сорок алтын, до Оболеньска полтина, до Звенигорода две гривны, до Дмитрова десять алтын, до Радонежа четверть рубля, до Переславля дватцать алтын, до Ростова рубль, до Ярославля два рубля с четвертию, до Вологды полтретья рубля, до Белаозера полтретьа рубля, до Устьюга пять рублев, до Вятки полосма рубля, до Вычегды семь рублев, до Двины и до Колмогор восемь рублев московская, до Юрьева рубль, до Володимеря рубль с четвертию, до Костромы полтора рубля, до Галича полтретьа рубля, до Стародубских князей отчины полтора рубля, до Мещеры два рубля, до Новагорода до Нижнего полтретья рубля, до Суздаля рубль с четвертию, до Мурома полтора рубля, до Углеча рубль, до Бежецкого Врьха полтора рубля, до Романова городка рубль с четвертию, до Клина полтина, до Кашина рубль, до Твери рубль, до Зубцова рубль, до Опок рубль, до Хлепни сорок алтын, до Торжку рубль с четвертью, до Вереи полтина, до Медыни полтретьятцать алтын, до Великого Новагорода полтретьа рубля, до Пскова полчетверта рубля, до Смоленска полтретьа рубля, до Иваня города полчетверта рубля, до Лук и до Торопца по получетверта рубля; а где будет болши того връст, ино имати по тому ж росчету.

   47. А ездити неделщиком с приставными и на поруку давати самим или своих ездоков посылати, а людей им своих с приставными не посылати; а от поруки им самим и их ездоком поклонного, с приставными ездячи, не имати ни у кого. А в котором городе неделщик жывет, и ему в том городе с приставными не ездити ни в свое место не посылати ни в какове деле. А которого неделщика пустят в недели, и сколко у которого неделщика будет заговорщиков и ездоков, кому с кем в заговоре делати и кому от кого с приставными ездити, и тому неделещику тех своих ездоков приводити к дьаком, которые дьаки у кормлений будут, да тех своих заговорщиков и ездоков неделщиком у дьяков записывати в книги для того, чтобы неделщики заговорщиков и ездоков своих не отпирали. А какову обиду или продажу ездок кому учинит и уличат его в том, и тот иск взяти на неделщике, от кого тот ездок ездил, а ездока казнити торговою казнью. А держати неделщику [до] семи ездоков, а болши семи ездоков неделщику не держати. А которого ездока изымают, а тот ездок в книгах у кормленых дьаков не писан ни у которого неделщика, и того ездока казнити торговою казнью; а будут тому ездоку истцы, и тех исцов иски взяти на том ездоке без суда. А как неделщик из недель выйдет, и тем ездоком в том городе от иных неделщиков не ездити; а которого ездока изымают, а он ездит в том же городе от иного неделщика, и того ездока казнити торговою казнью да вкинути в тюрму; а будут тому ездоку истцы, и те иски взяти все без суда на том неделщике, от которого тот ездок ездил, и на том ездоке. А которой ездок в котором городе жывет, и тому ездоку ни от какова неделщика в том городе не ездити; а которого ездока изымают, а в том городе, в котором жывет, в том же и с приставными ездит, и кто ему будут истцы, и те иски все взяти на нем без суда, а его казнити торговою казнью. А что заговорщик кому учинит какову продажу или обиду и уличят его в том, и те иски все взяти на от заговоре на всем, а его вкинути в тюрму. А без заговорщиков неделщиком недель не делати.

   48. А в которой город или в которою волость приедет неделщик или ездок с приставною, и ему явити приставная наместнику или волостелю или их тиуном; а будут оба исца того города или волости, а наместнику или волостелю оба будут судимы, и ему обоих исцов ставити перед наместником, или перед волостелем, или перед их тиуном. А не явит неделщик или ездок его намеснику или волостелю или их тиуном приставные, и обоих истцов перед тем наместником или волостелем и перед их тиуны не поставит, а будут оба истец и ответчик, одного города или одной волости, а ему будет оба судимы, и тот неделщик и ездок езду лишен, а доводчику на том неделщике или на его ездоке взяти хоженое.

   49. А кого даст неделщик на поруку в какове деле ни буди, и ему истцов и ответчиков не волочити, а ставити их перед судьями; а сроки им крестианом отписывати и безсудные по срочным давати по сроком по указу безволокитно, а кто станет волочити после срока, и на том взяти тому, кого волочит, проести по три денги на день. От безсудные неделщиком, опричь пошлин, не имати ни у кого ничего. А коли неделщик срок отпишет обоим истцом вместе, и ему взяти с обеих сторон одно хоженое; а опричь того не взяти ему нечего. А в езду в своем даст на поруку доколе ся дело кончает, и ему езд взяти на виноватом. А которой ищеа или ответчик к сроку не приедет, а пришлет в свое место срока отписывати, и неделщику взяти хоженое на одном на том, кто приедет в его место срока отписывати.

    50. А кто по кого пошлет пристава, а сам к сроку не приедет, или ответчик на тот срок не станет, и что после сроку тому учинитца убытка, что даст пошлин и что живучи проест, и правому те все убытки и проести взяти на виноватом; а проести имати на человека на день на голову по три денги.

    51. А пересудчиком пересуд имати на виноватом по две гривны; а менши рубля пересуду нет; а с поля со всякого пересуд; а список кто оболжывит да шлется на правду, и в том пересуд. А подвойским правого десятка четыре денги, а имати на виноватом же.

    52. А приведут кого с поличным впервые, ино его судити да послати про него обыскати. И назовут его в обыску лихим человеком, ино его пытати; и скажет на собя сам, ино его казнити смертною казнью; а не скажет на собя сам, ино его вкинути в тюрму до смерти, а исцов иск платити из его статка. А скажут в обыску, что он доброй человек, ино дело врьшити по суду.

    53. А пошлют котораго неделщика имати татей или розбойников, и ему имати татей и розбойников безхитростно, а не норовити ему никому; а изымав ему татя и разбойника, не отпустити, ни посулов не взяти; в опричных ему людей не имати. А поноровит которой неделщик татю или розбойнику по посулом, а его отпустит, и уличат его в том, и на том неделщике исцов иск доправити, а его казнити торговою казнью да вкинути в тюрму, а в казни что государь укажет.

     54. А у которого неделщика сидят тати, и ему татя без докладу не спустити, на поруку не дати и не спродати ему татя. А которой неделщик без докладу, и без боярского и без дьячего ведома, татей подает на поруку или татя спродаст, и уличат его в том, и на том неделщике исцов иск доправити вдвое, да казнити его торговою казнью да кинути в тюрму, а в казни что государь укажет.

     55. А котораго татя поимают с тадбою с какою ни буди впервые, опричь церковные и головные тадбы, а в ыной в прежней тадбы довода на него не будет, ино его казнити торговою казнью, бив кнутьем, да исцов иск доправити, а его дати на крепкую поруку; а не будет по нем крепкые поруки, ино его вкинути в тюрму, доколе порука по нем будет. А не будет у котораго татя столке статков, чем исцово заплатити, ино его, бив кнутьем, да исцу в его гибели выдати головою на правеж до искупа; а исца дати на поруку, что ему, доправя свое, отдати его бояром; а не похочет истец по себе поруки дати в том, что ему, иск свой доправя, да того татя привести к судье, и того татя кинути в тюрму, доколе по нем порука будет; а как по нем порука будет, и тогды на нем за его порукою, хто выручил ис тюрмы, исцов иск доправити. А как истец, взяв на нем свое, отдаст его бояром, и боярин велит его дати на крепкую поруку, кто ему будут вперед иные истцы; а не будет по нем крепкие поруки, ино его кинути в тюрму, доколе по нем порука будет. А судье с того не имати ничего.

     56. А поймают того ж татя с тадбою вдругие, ино его пытати; а скажет на собя сам, ино его казнити смертною казнью, а истцово заплатити изь его статка; а не будет у котораго татя с ысцову гибель, ино его казнити велети смертною казнью, а истцу вь его гибели не выдати. А пытан на собя не скажет, ино про него послати обыскати; и скажут про него, что он лихой человек, ино его кинути в тюрму до смерти; а назовут его добрым человеком, ино его дати на крепкую поруку; а не будет по нем крепкие поруки, ино его вкинути в тюрму, доколе по нем порука будет крепкая.

     57. А на кого тать взмолвит, и про того обыскати. И будет по обыску в какове деле в прежнем прирочной человек з доводом, ино его пытати; а скажет на собя сам, ино казнити татиною ж казнью. А не будет на него довода и в обыску про него худа не скажут, ино татиным речем не верити, дати его на поруку.

     58. А на кого взмолвят дети боярские человек десять или пятнадцать добрые, или черных людей человек пятнадцать или дватцать добрых же крестиан и целовальников по крестному целованью, что он тать, а довода на него в прежнем деле не будет, у кого крал или тадбу плачивал, ино на том взяти исцову гибель без суда, а его дати на крепкую поруку; а не будет по нем крепкие поруки, ино его кинути в тюрму, и без крепкие его поруки ис тюрмы не выпущати. А мошеннику та же казнь, что и татю. А хто на оманщике взыщет и доведут на него, ино у ищеи иск пропал. А оманщика, как его ни приведут, ино его бити кнутьем.

     59. А доведут на кого розбой, или душегубство, или ябедничьство, или подписку, или иное какое лихое дело, а будет ведомой лихой человек, и боарину велети того казнити смертною казнью, а исцово из его статка велети заплатити; и что ся его статка за исцовым останет, и то отдати в прогоны. А не будет у которого лихого столко статка, чем исцово заплатити, и боярину того лихово в ысцове гибели исцу не выдати, а велети его царя и великаго князя тиуну московскому да дворскому казнити смертною казнью. А боярину и дьяку и неделщику от того не имати ничего.

     60. А на кого доведут татбу или душегубство или иное какое лихое дело, опричь разбоа, в котором городе или волосте, а будет ведомой лихой человек, и наместнику или волостелю велети того казнити смертною казнью, а исцово велети доправити из ево статка; а что ся от исцова останет, и наместнику и его тиуну то имати собе. А не будет у которого лихово статка, чем исцово заплатити, и ему тово лихово исцу в его гибели не выдати, а велети его казнити смертною казнью, а на исце наместнику или волостелю и их тиуном не имати ничего. А приведут кого в розбое или кого в суде доведут, что он ведомой лихой человек розбойник, и наместником тех отдавати губным старостам. А старостам губным, опричь ведомых розбойников, у наместников не вступатись ни в что. А татей им судити по царевым великаго князя губным грамотам, как в них написано.

     61. А государьскому убойце, и градскому здавцу, и коромолнику, и церковному татю, и головному татю, и подметчику, и зажигалнику, ведомому лихому человеку, жывота не дати, казнити ево смертною казнью. А будет истец которому лихому человеку, и исцово заплатити из его статка; а что ево статка за исцовым останется, и то дати в прогоны. А не будет у которого лихово человека столко статка, чем исцово заплатити, ино его исцу в его гибели не выдати, казнити его смертною казнью.

     62. А боарам и детем боарьским судити, за которыми кормлениа з боарьским судом; а на суде у них и у их тиунов быти, где дворской - и дворскому, старосте, и лутчим людем и целовалником. А судные дела у наместников и у их тиунов писати земьским дьаком, а дворскому да старосте и целовалником к тем судным делом руки свои прикладывати. А противни с тех дел с судных писати слово в слово наместничим дьаком, а наместником к тем противнем печати свои прикладывати. Да тех судных дел записку земсково дьака руку з дворсково и з старостиною и с целовалниковыми руками наместником имати к собе; а противни тех дел наместником дьаков своих руку с своими печатми давати дворскому да старосте и целовалником давати; а которые староста и целовалники грамоте не умеют; и которые грамоте умеют, тем старостам и целовалником к судному списку земьского дьяка руке руки свои прикладывати; а противнем с тех дел наместнича дьака руке быти у того старосты и у целовалников, которые грамоте не умеют, и они его дръжат у собя спору для. А без дворского и без старосты и без целовалников наместником и их тиуном не судити; а где дворсково нет и преж сего не бывал, ино быти в суде у наместников и у их тиунов старосте и целовалником; а без старост и без целовалников суда не судити. И посулов наместником и их тиуном и их людем не имати, и на государя своево тиуну и пошлиннику никому посулов от суда не просити. А имати наместником от суда пошлин: доищется ищеа своего в заемном деле или в бою или в лае, и ему имати на виноватом с рубля по гривне, то ему и с тиуном; а не доищется ищеа своего, а будет ищеа виноват, и ему имати на ищее с рубля по тому ж, а будет дело выше рубля или ниже, ино имати на ищее или ответчике по тому ж розчету; а довотчику его имати хоженое и езд и правда по уставной грамоте; а где не будет грамоты, и ему имати в городе хоженого по четыре денги, а езду на версту по денги, а на правду в городе или в волосте вдвое. А досудятся до поля да, став у поля, помирятся, и ему имати с рубля по гривне ж, то ему и с тиуном, да полевых пошлин полтретьяцать алтын. А побьются на поле, ино на убитом полевых пошлин полтора рубля, а доспеха не имати. А побьются на поле в пожеге, или в душегубстве, или в розбои, или в тадбе, а убьют ответчика, ино на убитом исцово доправити, а сам убитой в казни и в продаже наместнику и его тиуну; а убьют на поле ищею в пожеге, или в душегубстве, или в розбое, или в татбе, и наместнику на нем имати с его иску четвертная пошлина по полуполтине с рубля, то ему и с тиуном, да полевых пошлин полтора рубля, а доспеху не имати.

     63. А суд боярской: которому наместнику дано с судом с боарьским, и ему давати полные и докладные; а правые и беглые давати з докладу; а без докладу правые и беглые не давати.

     64. А детей боарьских судити наместником по всем городом по нынешным царевым государевым жаловалным вопчим грамотам.

     65. А от правые грамоты имати боярину или сыну боарьскому, за которыми кормлениа с судом з боарьским, от печати с рубля по полутретьа алтына, то ему и с тиуном, да дьяку его, которой правую грамоту напишет, имати с рубля от писма по три денги; а тиун ево даст правую грамоту, и он емлет на государя своего и на собя от печати по тому ж с рубля по полутретья алтына, а дьяк емлет от писма, которой грамоту напишет, с рубля по три денги. А с холопа и с робы от правые грамоты и от полные боярину или сыну боарьскому, за которыми кормленье с судом з боарским, имати от печати з головы по полутретьа алтына, а дьаку от писма з головы по три денги.

     66. А наместником и волостелем, которые дръжат кормленья без боарьского суда, полных и докладных не давати, и холопа и робы без докладу не выдати, ни грамоты беглые не дати; також и холопу и робе на государя грамоты правые без докладу не дати. А которой наместник или волостель без боарьского суда выдаст холопа или робу без докладу и правую грамоту даст, и та грамота не в грамоту; а что государь того холопа или робы убытка своего скажет, и то взяти на судье вдвое, а истцом суд з головы.

     67. А тиуну намесничю на кормленье государю на холопа, ни холопу на государя правые грамоты без докладу правые грамоты не дати. А которой тиун государю на холопа или холопу на государя даст без доклада правую грамоту, и тому холопу, которой возмет правую грамоту на государя, дати суд з головы да то дело по суду и кончати, а наместнича или волостелина тиуна до царева государева указу вкинути в тюрму, а убытки все правому взяти на тиуне. А даст тиун государю на холопа правую грамоту без докладу, и та правая грамота не в грамоту, дати суд з головы.

     68. А которому наместнику дан в кормление город с волостьми, или ему даны в кормление волости, а в которых волостех наперед сего старост и целовалников не было, и ныне в тех волостех быти старостам и целовальником во всех. А случится кому в волостех перед наместником или перед его тиуном искати или отвечати, и в суде быти у наместников и у волостелей и у их тиунов тех волостей старостам и целовалником, ис которые кто волости ищет или отвечает. А судные дела писати земьскому дьаку тое ж волости. А без старосты и без целовалников наместником и волостелем, за которыми кормленьа з боарьским судом, и за которыми кормлениа без боярьскаго суда, и их тиуном также не судити. И посула в суде наместником и волостелем и их тиуном не имати.

     69. А пришлет наместник или волостель или их тиуни список судной к докладу, а будет ищеа или ответчик у докладу список оболжывит, ино послати на правду по дворского, и по старосту, и по целовалников, которые у того дела в суде сидели, да велети им того дела и противень списка наместнича или волостелина дьака руку с наместничею или с волостелиною печатью на исправу с собою привести. Да будут судные мужи скажут, што суд таков был, и руки у списка их, и противень будет наместнича или волостелина дьака с тем судным списком земьсково дьака рукою сойдется слово в слово, и тем тот виноват, хто список лживил, и список на него подписати. А скажут судные мужы, что суд был, да не таков, и список не земсково дьяка рука, и руки, скажут, у списка не их, и противень будет наместнича или волостелина дьака, с судным списком не в слово в слово, и по тому списку исцов иск взяти на судье, а пеню судье сверх того, что государь укажет. А будет скажет и дворской, и судные мужы, и старосты, и целовалники, которые грамоте умеют, что суд был таков, и руки у списка их, а те судные мужы, которые грамоте не умеют, с ними порознятся, скажут, что суд был, да не таков, а которой против наместнича или волостелина дьака руку положат, и тот противень с судным списком не слово в слово, и тем виноват судья и судные мужы, которые по списку такали; и взяти исцов иски на тех на судье и на тех судных мужех, которые по списку такали, а пеню сверх того что государь укажет. А не станет за списком ищеа или ответчик на срок, а довотчик на него запись поручную положит, и того, которой не стал, по довотчикову слову обвинити; а подписати на него список за сто връст семым днем по сроце; а дале ста верст или ближе, ино подписывати списки после срока по тому ж росчету.

     70. А кого наместничи или волостелины люди учнут давати от ково на поруку до суда и после суда, и по ком поруки не будет, и наместничим и волостелиным людем тех людей являти в городе прикащиком городовым да дворьскому, и старосте, и целовалником, а в волости являти старостам и целовалником, которые у наместников и у волостелей и у их тиунов в суде сидят; а не явя тех людей, по ком поруки не будет, и наместничим и волостелиным людем к собе не сводити и у собя их не ковати. А ково наместничи и волостелины люди, не явя приказщиком, да дворскому, да старосте и целовалником, к себе сведут да у собя ево скуют, и кто тем людем род и племя придут на наместничих или на волостелиных людей к приказщиком, да к дворскому, и к старосте, и к целовалником о том бити челом и являти, и приказщиком, и дворскому, и старосте, и целовалником у наместничих и у волостелиных людей тех людей выимати; и кого у наместничих и у волостелиных людей вымут скована, а им не явлена, ино на наместниче или на волостелине человеке взяти безчестие, посмотря по человеку; а чего тот на наместниче или на волостелине человеке взыщет, и тот иск взяти на нем вдвое.

     71. А наместником и волостелем, которые дръжат кормлениа, и тиуном царя и великаго князя, и боярьским тиуном, и детей боарьских тиуном татя и душегубца и всякаго лихого человека без докладу не продати, ни казнити, ни отпустити. А кто татя или душегубца и всякого лихого человека отпустит, или без докладу продаст или казнит, и на том судье истцовы иски доправити вдвое, а в государеве пене кинути в тюрму до царева государева указу.

     72. А по городом наместником городских посадских всех людей промеж их судити, обыскивая по их животом и по промыслом и по розмету: скольке рублев кто цареву и великаго князя подать дает, по тому их, обыскивая, судити и управа чинити. А розметныя книги старостам и соцким и десяцким и всем и людем тех городов своих розметов земсково дьака руку за своими руками ежегод присылати на Москву к тем боаром, и дворецким, и х казначеем, и к дьаком, у кого будут которые городы в приказе; а другие книги розметные своих розметов старостам и соцким и десяцким тех городов, где кто живет, отдавати тех городов старостам и целовалником, которые у наместников в суде сидят. И кто тех городов городцкие посадцкие люди учнут промеж собя искати много, не по своим животом, и про тех исцов сыскивати розметными книгами, сколко он рублев своего жывота подати дает; и будет жывота ево столко есть, и на сколко ищет, ино ему дати суд; а будет жывота ево сколке нет, и тех исцов в их искех тем и винити, а пошлины имати по Судебнику, а цареве государеве пене велети дати на поруку да прислати к Москве ко государю. А городцким посацким людем искати на наместникех и на их людех по своим жывотом и по промыслом и по розмету; а которого году староста и целовалники розметных книг к Москве не пришлют, и в том году на наместника суда им не дати. А по волостем волостелем судити черных людей по их жалобницам и управа им чинити безволокитно. А кто взыщет много, не по жывотом, а ответчик учнет бити челом, а скажет, что тот истец ищет много, не по жывотом, а жывота его столко нет, на колко ищет, и тем волостелем посылати о том, выбираючи тех же волостей лутчих людей да целовалника одного или двух посмотря по делу, а велети про то обыскати накрепко: было ли жывота ево столко, на колко ищет; и скажут в обыску, что жывота ево столко было, ино в том ему суд дати; а скажут в обыску, что столке жывота ево не было, ино его обвинити и пошлины на нем взяти, а в государеве пене, и в ябедничьстве дати его на поруку да прислати с обыскным списком к Москве.

     73. А который человек скажет, что у него был живот чюжей, и того обыскивати, был ли у него тот жывот и было ли столко того жывота; и чей скажет тот у него жывот был, ино про то обыскати, было ли у него столке жывота, и которым обычаем тот у него жывот взят; да по тому дело и вершити.

     74. А на котором городе будут два наместника или на волосте два волостеля, а суд у их не в розделе, и им имати пошлины по списку обема за одного наместника, а тиуном их за одного тиуна, и они собе делят по половинам. А которые городы или волости поделены, а случитца у них суд вопчей, и им обема пошлины имати одны, да те им пошлины делити межц собя по половинам же. А возмут те два наместника или два волостеля или два тиуна с одново дела пошлину вдвое, и уличат их в том, и тому, на ком пошлины взяли, на тех наместникех или на волостелех и на их тиунех те пошлины велети взяти втрое.

     75. А кто пошлет пристава по наместника, по боарина, или по сына боарьского, или по волостеля, и по их тиунов, и по царева великаго князя тиуна и по довотчиков, и наместнику, или волостелю, и их тиуном, и великого князи тиуном и довотчиком отвечати к сроку ехати; а не поедут к сроку сами, и им к сроку в свое место послати к ответу; а не приедут сами к ответу и в свое место не пришлют отвечати после срока за сто връст в семой день, и тех обинити и исцовы иски по жалобницам и неделщиков езд доправити на тех, да отдати иск ищеам. А срочных по приставным на наместников и на волостелей и на их тиунов не наметывати; а из далних городов розчитати по връстам по тому ж росчету. А з записми не посылати никуды, опричь ведомых розбойных дел, а наместников и волостелей и их тиунов и их людей, опричь приказных дел, в которых делех велит государь дати запись. А приставов з записми по наместников и по волостелей и по их тиунов давати, а велети им чинити срок, как сьедет з жалованиа, опричь тех записей, которую запись велят дати бояре, приговоря вместе; а одному боярину и дьяку пристава з записью не дати.

     76. А О ХОЛОПСТВЕ СУД. По полной холоп грамоте. По ключю по селскому з докладною холоп з женою и з детми, которые у одново государя с ним в одной крепости и которые породилися в холопстве; а которые его дети а родились до холопства, а учнут жыти у иного государя, или себе уснут жыти, то не холопи. А по городцкому ключю не холоп. По робе холоп; по холопе роба. По духовной холоп. По приданой робе холоп, а по холопе роба. А по тиунству без полные и без докладные не холоп; а по селскому ключю без докладные не холоп. А полному и докладному холопу сына своего слободного, который ся у него родил у него до холопства, не продати, а продат(ся) он сам кому хочет, тому же ли государю, у кого отец его служит, или иному кому хочет; а отцу его и матери у полные не стояти и ис холопства не взяти, потому что отец его и мати сами в холопех; да и в полных и в докладных то писати, что отец у него и мати есть, а у полные не стоали, потому что сами в холопех. А у кого отец в чернцех или мати в черницах, и тому отцу и матери у своего сына и у дочери у полные и у докладные не стоати и из холопства не взяти; а в полные и в докладные писали, что у того отець или мати есть, а у полных и у докладных не стоали, потому что пострижены; да и не продати тех детей своих, продаст(ся) он сам кому хочет.

 

     77. А отпускные давати з боарьского докладу; а бояром к тем отпускным печати свои прикладывати, а дьаком подписывати. А отпускные давати на Москве бояром и дьяком, да давати отпускные в Великом Новегороде да во Пскове наместником и дьаком. А пошлины имати от отпускные боарину или наместнику от печати з головы по девяти денег, а дьаку от подписи з головы по алтыну, а подьячему, которой отпускную напишет, з головы по три денги. А опричь Москвы да Великого Новагорода и Пскова инде нигде ни в которых городех отпускных не давати. А хто положит отпустную без боарьского докладу, и без новгородцких и псковских наместников докладу, и без дьачей подписи, хотя и государя своего руку, и та отпускная не в отпускную.

     78. А которые люди волные учнут бити челом князем, и бояром, и детем боярьским, и всяким людем, а станут на собя давати кабалы за рост служити, и боле пятинатцати рублев на серебряника кабалы не имати. А старые кабалы, которые иманы на волных людей и болши пятинатцати рублев до сего Уложениа а за рост им в тех денгах служити у них, и тем людем приносити те кабалы к боаром, и боаром к тем кабалам печати свои прикладывати, а дьаком подписывати; а вперед хто ту кабалу оболжывит, и та кабала врьшити по суду. А имати им кабалы на волных людей, а на полных людей, и на докладных, и на старинных холопей кабал не имати. А хто возмет на полного, и на докладного, или на стариннаго холопа кабалу, не опытав, или кто на него беглую грамоту возмет, а хто на того холопа положыт полную или докладную, или доведет на него старинное холопство по духовной грамоте или по иным крепостем, и у того денги пропали; а чей тот холоп был, а скажет то, что от него тот збежал, пократчи, и та гибель, взяти на том, хто, не обыскав, на чюжего холопа кабалу возмет или беглую возмет; а тот холоп по старому холопству, или по полной, или по докладной, или по духовной тому государю.

     79. А положат на одново холопа две полные или две докладные, и котораа будет старее, тому тот холоп, а денги по новой полной или по докладной пропали у того; а снос старого государя взяти на том, хто положит новую полную и докладную, а тот ся ведает с своим знахорем сам; а станет тот на того знахаря бити челом о суде, ино на него суд дати.

     80. А холопа рать полонит, а выбежит ис полону, и он слободен, а старому государю не холоп. А похочет тот холоп к своему старому государю, и того холопа явити бояром, а дьяку подписати на старой крепосте, а пошлины имати з головы по алтыну. А которой холоп побежит з государем своим или один побежит без государя своего, а не рать полонит, и выйдет тот холоп ис которые земли опять к Москве, и он старому государю холоп по старому холопьству, опричь того, не что кого государь пожалует, даст волную грамоту.

     81. А детей боарьских служилых и их детей, которые не служивали, в холопи не приимати никому, опричь тех, которых государь от службы отставит.

     82. А кто займет сколько денег в рост, и тем людем у них не служити ни у кого, жити им собе, а на денги рост давати им. А кто даст денег в заем, да того человека станет дръжати у собя, и збежит от него тот человек покрадчи, и что снесет, то у него пропало, и по кабале денег лишен.

     83. А наймит у государя у своего не дослужит уроку да поидет прочь, ино найму лишен. А которой государь наймиту не захочет дать найму, и уличат его в том, и наймиту на том доправити наем вдвоем.

     84. А О ЗЕМЛЯХ СУД. Взыщет боярин на боарине, или монастырь на монастыре, или боярин на монастыре, ино судити за три годы; а взыщет монастырь на боярине, ино судити за три ж годы, а дале трех годов не судити; а взыщет черной на черном, или помещик на помещике, за которыми земля царя и великаго князя, или черной селской на помещике, или помещик на черном на сельском, ино судити по тому ж за три годы; а дале трех годов не судити. А взыщет на боарине или на монастыре царя и великаго князя земли, ино судити за шесть лет; а дале не судити. А которые земли за приставом в суде, и те земли досуживати. А государю и бояром всем приказным людем по ищеину челомбитью судьи на землю не посылати, а послати судью на землю, выбрав одного не по их челомбитью; а дву судей на землю не посылати.

     85. А В ВОТЧИНАХ СУД. Кто вотчину продаст, и детем его и внучатом до тое вотчины дела нет, и не выкупити ее им; а братья будут или племянники в тех купчих в послусех, и им и их детем по тому ж до тое вотчины по тому ж дела нет и внучатом. А не будет братьи в послусех или племянников, и братья или сестры и племянники ту вотчину выкупят. А станет тот купец ту вотчину продавати, и тем продавцом вотчина у них купити полюбовно, как ему тот продавец ту вотчину продаст; а не полюбовно ему вотчины не выкупити. А судити о вотчине за сорок лет; а дале сорока лет вочьчичем до вотчины дела нет. А до купель дела нет: кто куплю продаст, и детем и братьем и племянником тое купли не выкупати. А кто напишет свою куплю детем своим после своего жывота, ино им вотчина: то им дръжати в вотчину, и впредь им та вотчина выкупити по тому ж указу за вотчину. А кто вотчину свою выкупит в те урочные сорок лет, и та ему вотчина дръжати за собою, а иному тое вотчины не продати, ни заложити в чюжей род, а отдати ему та вотчина в свой род тому ж, кого нет в прежних купчих в послусех. А хто купит вотчину чюжими денгами или заложит или продаст, а доведет на него продавец, что он выкупил чюжими денгами и дръжит ее не за собою, и та вотчина прежнему продавцу безденежно. А кто похочет вперед свою вотчину мимо вотчичев заложыти у сторонного человека, и тем сторонним людем и невоччичем те вотчины в заклад имати в колке чего та вотчина судит; а возмет кто сторонней человек, а не вотчичь,чью вотчину в заклад во много болши тое цены, чево та вотчина судит, и хто вотчин учнет бити челом, что закладывает или уже заложил в чюжей род, и тому вотчичю та вотчина в заклад взяти в меру, чево та вотчина судит; а што тот денег болши того дал в заем лишек болши тое цены, чево та вотчина судит, и у того те денги пропали. А хто свою вотчину променит невотчичю, а примет денег, и хто вотчичь ту вотчину учнет выкупати, и тому та вотчина выкупати; а земли ему оставити в меру, сколко он своей земли променил.

     86. А промеж сел и деревень городити изгорода, по половинам: а чьею изгородою учинитца протрава, ино тому платити, чья изгорода. А где отхожие пожни от сел и от деревень, ино поженному государю не городитись, городит тот всю изгороду, чьа к пожни земля орамая пришла. А кто вытравит какой хлеб или пожню, и тот хлеб и пожню платити тому, чьа изгорода.

     87. А кто сорет межу или грань ссечет из царевы и великаго князя земли у боарина или у монастыря, или боарьской у монастырского, или монасты(рьско)й у боарской, и хто в тех межу сорет или грань ссечет, ино того бити кнутьем да исцу на нем взяти рубль; а крестиане меж собя в одной волости или в селе хто у кого межу сорет или перекосит, ино волостелю или посельскому имати на нем за боран два алтына.

    88. А крестианом отказыватись из волости в волость и из села в село один срок в году: за неделю до Юрьева дни до осеннего и неделя по Юрьеве дни осеннем. А дворы пожилые платят в поле рубль и два алтына, а в лесех, где десять връст до хоромного лесу, за двор полтина и два алтына. А которой крестианин за кем жывет год да пойдет прочь, и он платит четверть двора; а два года поживет, и он платит полдвора; а три годы пожывет, и он платит три четверти двора; а четыре годы поживет, и он платит весь двор, рубль и два алтына. А пожитое имати с ворот. А за повоз имати з двора по два алтына; а опричь того пошлин на нем не имати. А останетца у которого крестианина хлеб в земли, и как тот хлеб пожнет, и он с того хлеба или с стоачего даст боран два алтына; а по кои места была рож его в земле, и он подать цареву и великаго князя платит со ржы, а боярского дела ему, за кем жыл, не делати. А попу пожылого нет, и ходити ему вон безсрочно воля. А которой крестианин с пашли продаст(ся) в холопи (в) полную, и он выйдет безсрочно ж, и пожылого с него нет; а которой хлеб его останется в земле, и он с того хлеба подать цареву и великаго князя дает; а не похочет подати платити, и он своего хлеба землянаго лишен.

     89. А убьют ко(торо)го крестианина на поле в розбое или в ыном в котором в лихом деле, и дадут того крестьанина за государя его, за кем жывет, или выручит его государь тот, за кем живет, и пойдет тот крестианин из-за него вон, ино его выпустити; а на отказщика в том деле взяти порука з записью: попытают того крестианина на том его государе, за кем жыл, в ыном в каковем деле, и он бы был в лицех.

     90. А который купец, идучи на торговлю, возмет у кого денги или товар, да на пути у него утеряется безхитростно тот товар, истонет, или згорит, или рать или розбой возмет, и боярин, обыскав,тому велит дати цареву и великаго князя полетнюю грамоту с великого князя печатью: посмотря по животом, платится исцом в ыстину без росту. А кто у кого, идучи в торговлю, взяв да пропьет или иным каким безумием тот товар погубит без напрасньства, и того выдати истцу головою до искупа. А в розбойном деле дадут кому полетнюю грамоту, и как своего розбою доищется, или в его иску розбойников поимают, и у того грамота его полетняя не в грамоту.

     91. А попа, и дьакона, и черньца, и черницу, и старую вдовицу, которые питаются от церкви божией, ино их судити святителю или его судьям; а будет простой человек с церковным ино суд вопчей; а которая вдовица питается не от церкви божией, а жывет своим домом, ино то суд не святителской. А торговым людем городцким в монастырей в городцких дворех не жити, а которые торговые люди учнут жыти на монастырех, и тех с монастырех сводити да и наместником их судити. А на монастырех жыти нищим, которые питаются от церкви божий милостынею.

     92. А которой человек умрет без духовной грамоты, а не будет у него сына, ино статок весь и земли взяти дочери; а не будет у него дочери, ино взяти ближнему от его роду.

     93. А кто купит на торгу что поношено у носящего или с лавки, ино тому купити с порукою с рядовою; а кто купит без поруки, и тому тем быти виновату.

     94. А кто купит лошадь на Москве или в Московском уезде, и тем лошади пятнати у пятенщиков на Москве да и в книги написати по старине; а пошлина имати пятенщиком по старине же.

     95. А по городом и по волостем где кто лошадь купит или менит, тут у наместников, и у волостелей и у их пошлинников и пятнает; а записывати те лошади в книги у целовалников дьаку земскому; а пятенщиком имати с купца денга, а с продавца денга же. А целовалником и дьаку земскому у тех наместников и у волостелей пятна их писати образцы в книги спору для. А хто купит лошадь в своей волости или выменит, а до такова ж дни не запятнает и в книги не запишет, и уличат его в том, и на том, кто купит или выменит, взяти наместнику или волостелю или пятенщику пропятениа два рубля; а хто поимався за ту лошадь да чего с тою лошадью взыщет, доколе еа не запятнил, и на том тот иск взяти без суда, хто ее не запятнил. А детем боярьским купленые и меновные лошади пятнати по тому ж. А в служебнем походе кто у кого купил лошадь, и кто у него за ту лошадь поимается, и тот, хто купил, поставит свидетелей человек пять или шесть на того, у кого купил, а запрется тот, у кого купил, ино им суд. А кто где купит лошадь или выменит не в своем присуде, тот тут и пятнит; а приведет ту лошадь к собе непятнану, и уличат его в том, и на том пропятение взяти, у кого он в присуде.

     96. А наместником, и волостелем, и их тиуном, и пятенщиком в городех и в волостех непродажных и доморощеных лошадей на пятнати. А кто учнут в городех или в волостех непродажные и доморощеные лошади пятнати, и доведут на него то, и хто на нем взыщет чего в тех лошадех, и те ему убытки платити без суда втрое, а в пене что государь укажет.

     97. А которые дела преж сего Судебника вершены, или которые не вершены в прежних во всяких делех, суженых и несуженых, и тех дел всех не посуживати, быти тем делом всем в землях, и в холопстве, и в кабалах, и во всяких делех и в тиуньстве судити по тому, как те дела преж сего сужены, вершены. А вперед всякие дела судити по сему Судебнику и управа чинити по тому, как царь и великий князь в сем Судебнике с которого дни уложил.

     98. А которые будут дела новые, а в сем Судебнике не написаны, и как те дела с государева докладу и со всех боар приговору вершается, и те дела в сем Судебнике приписывати.

     99. Да велети прокликати по торгом на Москве и во всех городах Московские земли, и Ноугородцкие земли, и Тверские земли и по волостем, чтоб ищеа или ответчик судьам и приставом посулов в суде не сулили; а послуси бы, не видев, не послушествовали, а видев сказали б в правду. А послух опослушествует, не видев, лжыво, а обыщется то опосле, ино на виноватом послухе гибель исцова и убытки все, а в вине казнити торговою казнью. 

     100. О СУДЕ С УДЕЛНЫМИ КНЯЗИ. А взыщет москвитин какова дела на селских волостелех, которые селца московские за уделными князьми, ино судити царю и великому князю; а не отвечает волостель селецкой, и царю и великому князю его обвинити. А взыщет селецкой на селецком, а судит их их же волостель. А не будет их князя на Москве, и волостелю к докладу с Москвы не вести, а ждати князя на Москве; а поведет их волостель с Москвы к докладу к своему князю, а утечет тех исцов один к царю и великому князю и бьет челом царю и великому князю на того волостеля, и царю и великому князю на того волостеля дати пристава; а повезет его через то в удел, и тем его царь и великий князь обинит. А бьет челом царю и великому князю царя и великого князя сын боярской на уделного человека, и царь и великий князь, воименовав своего судью, да пошлет к своему брату к уделному князю, коли будет князь на Москве, и уделной князь даст своего судью; а суду быти на Москве, хотя б тот человек был в его деле на Москве. А уделного князя сын боярской бьет челом на царева и великого князя человека, ино суду быти такоже на Москве. А бьет челом царю и великому князю жалобник уделного князя человек из его вотчины на царева и великого князя человека, и царь и великий князь даст пристава, да судит царь и великий князь сам. А на москвитине взыщет которого князя уделного городцкой человек, ино судити их намесником  московским а без судьи. А искати москвитину на уделного князя городцком человеке, ино ему ехати с судьею, а судье быти московских намесников. А деловые люди в монастырских станех которого князя, и писцы царя и великого князя пишут их под сотника в дань и во все проторы, а князю над ними суд один. А случитца суд сместной в селцах в монастырских уделному с уделным, или деловым с становым и з городцким, или с селецким и с монастырским, и судьям доложити царя и великого князя, а третьего им в том нет ничего.

Выверено по изданию: Российское законодательство X–XX вв. под общей редакцией О.И. Чистякова. Т.2. М.: Юридическая литература, 1984.